Parêzerên Rêberê KCK'ê Abdullah Ocalan wê sibe hewl bidin ji bo hevdîtinê biçin Girava Îmraliyê.

Ji parêzerên Ocalan, Omer Guneş, Mehmet Bayraktar û Mehmet Sanî Kizilkaya, wê sibe ji bo hevdîtina heftane derbasî Girava Îmraliyê bibin, biçin Fermandariya Cendirmeyan a Gemlîkê.

Ocalan di hevdîtina hefteya derbasbûyî de bal kişandibû ser pêkanînên kêfî yên rêveberiya tirk.

Ocalan diyar kiribû ku, rayedarên tirk bi zorê porê wî qusandiye û dixwazin bi vê peyama 'ew hertim di bin kontrola dewletê de ye' bidin.

Ocalan, qusandina porê wî, wekî hewldana rûmet-şikandinê nirxandibû û ji bo dawî li pêkanînên rûmet-şikandinê bîne, rêveberiya tirk hişyar kiribû.

Ocalan diyar kiribû ku, ligel hemî pêkanînên rayedarên tirk ewê bizanibe ku şexsiyet û rûmeta xwe biparêze û gotibû ku wê heta nefesa xwe ya dawî, bi rûmet û şeref bijî.

Ocalan careke din bi bîr xistibû ku, ewê çalakiyên wekî întixarî pêk neyîne û gotibû heger tiştek wisa çêbibe jî, wê berpirsiyar dewlet bi xwe be.

Ocalan operasyona li hemberî orgeneralên teqawitbûyî jî, wekî şerê serdestî yê neteweperest û AKP'iyan nirxandibû û ji kurdan jî xwestibû nebin aliyê vî şerî.

Rêberê KCK'ê Abdullah Ocalan di heman hevdîtinê de ji kongreya DTP'ê jî, serkeftin xwestibû û gotibû, heger pirsgirêkên wan hebin, bila bi riya kongrê çareser bikin û ji bo demokratîk-kirinê jî, çi ji destê wan bê, bila bikin.