Li navçeya Stenbol Kadikoyê doh bi beşdariya nêzî 100 hezar kesan mîtînga ji bo çareseriya demokratîk hate lidarxistin.

Nêzî 100 hezar kesên tevlî mîtîngê bûn, operasyonên artêşa tirk şermezar kirin û banga çareseriya demokratîk li rêveberiya tirk kirin.

Beşdarên mîtîngê bi dengekî bilind dilsoziya xwe ya bi Rêberê KCK'ê Abdullah Ocalan re jî anîn ziman û ji dewleta tirk xwestin ku, ji bo çareseriya demokratîk, dawî li operasyonan bîne û bi nunerên kurdan re jî bikeve nava diyalogê.

Koma Civakên Kurdistan KCK'ê jî mîtînga doh silav kir û got ku, ewê wekî aliyê kurd, banga bi hezaran kesan li ber çavan bigirin û xwest ku, dewlet jî guh bide daxwazên beşdarên mîtîngê.

Serokatiya Konseya Rêveber a KCK'ê bal kişand ser hewldanên ji bo çareseriya demokratîk ya Rêberê KCK'ê û Tevgera Azadiyê û got: 'Pratîka heta niha îspat kir, bi hewldanên yekalî çareserî pêk nayê. Ji bo çareseriya aştiyane pêwistî bi hewldanên du-alî hene. Heger hewldanên du alî hebin, wê aştî pêk bê'.