Operasyona li bejahiya Dersimê dewam dike û HPG'ê jî nasnameya 11 gerîlayên tevlî şer bûne eşkere kir.
Navenda çapemeniya HPG'ê, derbarê çalakî û şerên hefteya dawî de, daxuyaniyek weşand û diyar kir ku, li Amed, Mêrdîn û Bîtlîsê ji ber operasyona artêşa tirk şer derketine.

HPG'ê da zanîn ku, gerîlayan roja şemiyê li herêma Şehîd Brûsk ya Amedê, leşkerên tirk kirine kemînê û di encamê de 2 leşker kuştine û 3 leşker jî birîndar kirine.

Gerîlayan li hemberî helîkoptera Skorsky ku xwestiye mirî û birîndaran rake jî, çalakiyek pêk anîne û di encamê de helîkoptera Skorsky darbe xwariye.

Navenda çapemeniya HPG'ê anî ziman ku, gerîlayên wan, li herêma Omeriya Mêrdînê jî, leşkerên tirk, ku li nêzî gundê Qawaqê bi cih bûbûn, xistine kemînê.

Di encama çalakiyê de 3 leşker mirin û 2 leşker jî birîndar bûne.

Gerîlayên HPG'ê, çalakiyeke din, li Bedlîsê, li hemberî leşkerên derketibûn operasyonê pêk anîn.

Di encama çalakiya li herêma Şêx Cuma de jî, 2 leşkerên tirk mirine û 3 leşker jî birîndar bûne.

Navenda Çapemeniya HPG'ê da zanîn ku, gerîlayên wan, di 4'ê nîsanê de li bejahiya navçeya Sêrt Şîrvanê jî, li leşkerên tirk xistine, lê belê derbarê encamê de agahiyên zelal bi dest neketine.

Di vê navberê de, HPG'ê diyar kir ku, operasyona artêşa tirk di 10'ê nîsanê de li bejahiya navçeyên Çewligê, Yayladere û Karaqoçanê dabû destpêkirin, dewam dikin.

HPG'ê got ku, hêzên tirk di 11'ê nîsanê de li bejahiya navçeya Kigî û di 12'ê nîsanê de, li herêma Şehîd Serxwebûn û qadên Horozbaba, Beşler, Gol, Dalitepe û Şîranê jî, dest bi operasyonan kirine.

HPG'ê anî ziman ku, operasyonên li herêmê hê dewam dikin.

Biryargeha Navendî ya HPG'ê bi daxuyaniyeke nivîskî bal kişand ser şerê li bejahiya Dersimê.

HPG'ê diyar kir ku, ji ber operasyona hêzên tirk ya 9'ê nîsanê, di 10'ê nîsanê de, li bejahiya Nazimiyeyê şerê dijwar derketiye.

Biryargeha Navendî ya HPG'ê da zanîn ku, 11 gerîlayên wan tevlî şerê li herêmê bûne, lê belê heta niha ev 11 gerîla hê negihiştine yekîneyên xwe û derbarê aqûbeta wan de jî tu agahî neketiye ber destê wan.

HPG'ê nasnameyên 11 gerîlayên tevlî şer bûne û ji wan tu agahî nehatiye girtin jî, eşkere kir.

Li gorî daxuyaniyê gerîlayên ji wan tu agahî nehatine girtin ev in.